第五十二回 小儿女独宿怯空房 贤主宾长谈邀共榻 (1)
按：琪官、瑶官两人离了拜月房栊，趁着月色，且说且走。瑶官道：“今朝夜头个亮月，比仔前日夜头再要亮。前日夜头末闹热仔一夜天，今朝夜头一个人也无拨。”琪官道：“俚哚阿算啥赏月嗄，像倪故歇，故末倒真真是赏个月。”瑶官道：“倪索性到蜿蜒岭浪去，坐来哚天心亭里，一个花园通通才看见。该首赏月末最好哉。”琪官道：“正经要赏月，耐阿晓得哈场花？来里志正堂前头高台浪，有几花机器，就是个看亮月同看星个家生。有仔家生，连搭仔太阳才好看哉，看仔末，再有几花讲究。俚哚说同皇帝屋里观象台一个样式，就不过小点。’”瑶官道：“价末倪到高台浪去罢。倪也用勿着俚家生，就实概看看末哉。”琪官道：“倘忙碰着个客人，勿局个。”瑶官道：“客人才匆来浪呀。”琪官道：“倪还是大观楼去张张孙素兰阿曾困，故末蛮好。”瑶官高兴，连说：“去囗。”
两人竟不转弯归院，一直踅上九曲平桥，遥望大观楼琉璃碧瓦映着月亮，也亮晶晶的射出万道寒光，笼着些迷蒙烟雾。两人到了楼下，寂静无声，上下窗寮一律掩闭，里面黑魆魆地，椎西南角一带楼窗系素兰房间，好像有些微灯火在两重纱馒之中。两人四顾徘徊，无从进步。
琪官道：“常恐困哉囗。”瑶官道：“倪喊声俚看。”琪官无语，瑶官就高叫一声：“素兰先生。”楼上不见接应，却见纱幔上忽然现个人影儿，似是侧耳窃听光景。瑶官再叫一声，那人方卷幔推窗，望下问道：“啥人来里喊？”琪官听声音正是孙素兰，搭嘴道：“倪来张耐呀，阿要困哉？”素兰辨识分明，大喜道：“快点上来囗，倪勿困囗。”瑶官道：“勿困末，门才关哉（口宛）。”素兰道：“倪来开，耐等一歇。”琪官道：“（要勿）开哉，倪也转去困哉。”素兰慌的招手跺脚。道：“（要勿）去呀，来开哉呀！”瑶官见其发急，怂恿琪官略俟一刻。那素兰的跟局大姐一层层开下门来，手持洋烛手照，照请两人上楼。
素兰迎见，即道：“我要商量句闲话，耐两家头困来里（要勿）转去，阿好？”琪官骇异问故，素兰道：“耐想该搭大观楼，前头后底几花房子，就剩我搭个大姐来里，阴气煞个，怕得来，困也生来困勿着。正要想到耐搭梨花院落来末，倒刚刚耐两家头来喊哉。谢谢耐，陪我一夜天，明朝就匆要紧哉。”瑶官不敢作主，转问琪官如何。琪官寻思半日，答道：“倪两家头团来里，本底子也勿要紧。故歇比勿得先起头，有点间架哉。要末还是耐到倪搭去哝哝罢，不过怠慢点。”素兰道：“耐搭去最好哉，耐末再要客气。”
当下大姐吹灭油灯，掌着灯台，照送三人下楼，将一层层门反手带上，扣好钮囗。琪官、瑶官不复流连风景，引领素兰、大姐径望梨花院落归来。只见院墙门关得紧紧的，敲够多时，有个老婆子从睡梦中爬起，七跌八撞开了门。瑶官急问：“阿有开水？”老婆子道：“陆里再有开水！啥辰光哉嗄，茶炉子隐仔长远哉。”琪官道：“关好仔门去困，（要勿）多说多话。”老婆子始住嘴。
四人从暗中摸索，并至楼上琪官房间。瑶官划根自来火，点着大姐手中带来烛台，请素兰坐下。琪官欲搬移自己铺盖，让出大床给素兰睡。素兰不许搬，欲与琪官同床，琪官只得依了。瑶官招呼大姐，安顿于外间榻床之上。琪官复寻出一副紫铜五更(又鸟)，亲手舀水烧茶。琪官也取出各色广东点心装上一大盘，都将来请素兰。素兰深抱不安。
三人于灯下围坐，促膝谈心，甚是相得。一时问起家中有无亲人，可巧三人皆系没爷娘的，更觉得同病相怜。琪官道：“小个辰光无拨仔爷娘，故末真真是苦恼子！阿哥、阿嫂陆里靠得住？场面蛮要好，心里来哚转念头。小干仵勿懂啥事体，上仔俚哚当还勿曾觉着。倘然有个把爷娘来浪，我为啥到该搭来！”素兰道：“一点勿差。我爷娘刚刚死仔三个月，阿伯就出我个花样，一百块洋钱卖拨人家做丫头。幸亏我晓得仔，告诉仔娘舅，拿买棺材个洋钱还拨仔阿伯，难末出来做生意。陆里晓得个娘舅也是个坏坯子，我生意好仔点，骗我五百块洋钱去，人也匆来哉！”
瑶官在旁默然果听，眼波莹莹然要吊下泪来。素兰顾问道：“耐来仔该搭几年哉？”琪官代答道：“俚乃再要讨气！来个辰光俚个爷一淘同得来，俚自家也叫俚‘爷’。后来我问问俚，啥个爷嗄，是俚慢娘个姘头！”
素兰道：“耐两家头运道倒无啥，才到仔该搭来也罢哉。我个命末生来是苦命，才说我无拨帮手个勿好，碰着仔要紧事体，独是我一于子发极，再有啥人替我商量商量？有仔点勿快活，闷来浪肚皮里，也无处去说（口宛）。要寻个对景点娘姨、大姐，才难煞哚。”琪官道：“耐也总算称心个哉，比仔倪好多花哚。像倪就说是两家头，阿有啥用场嗄？自家先一点点做匆来主，再要帮别人，生来勿成功。停两年，也说勿定倪两家头来浪一堆匆来浪一堆。”
素兰道：“说到后底事体，大家看勿见，怎晓得有结果无结果？我想无拨啥法子，过一日末是一日，碰去看光景。”瑶官插说道：“倪末来里过一日是一日。耐个后底事体，有点数目来浪。华老爷搭耐好得非凡，嫁得去末，端正享福好哉，阿有啥看勿见？”素兰失笑道：“耐倒说得写意哚。要是实概说起来，齐大人也蛮好（口宛），耐两家头为啥勿嫁拨仔齐大人嗄？”瑶官道：“耐末说说正经就说到仔歪里去！”琪官点头道：“闲话倒也是正经闲话，总归做仔个女人，大家才有点说匆出个为难场花，外头人陆里晓得？单有自家心里明白。想来耐华老爷好末好，终勿能够十二分称心阿对？”
素兰抵掌道：“耐个闲话故末蛮准，可惜我匆是长住来里，住来里仔同耐讲讲闲话，倒无啥。”瑶官道：“故也陆里说得定？倪出去也匆晓得，耐进来也匆晓得，耐说个‘碰去看光景’。”琪官道：“我说大家闲话对景仔，倒勿是定归要来浪一堆；就匆来浪一堆，心里也好像快活点。”素兰闻言，欣然倡议道：“倪三个人索性拜姊妹阿好？”瑶官抢说：“蛮好，拜仔末大家有照应。”
